• Un traballo monumental: O volume recolle un total de 710 entradas ordenadas alfabeticamente. Funciona como un ensaio enciclopédico pero mantén a frescura e o feitizo dun libro de contos. 
• Rescate da tradición oral: Os autores pasaron anos recompilando testemuños de viva voz polos pobos e aldeas de Galicia, salvando do esquecemento lendas e mitos transmitidos de xeración en xeración.
• A variedade de criaturas: Nas súas páxinas conviven figuras universais do imaxinario galego como a Santa Compaña, as meigas, as mouras e os trasnos, xunto con seres menos coñecidos ou puramente locais como os olláparos, as xacias, as lavandeiras, os tardos ou o Gatipedro. 
• Edicións e vixencia: O libro mantense moi vivo na cultura galega. Tras as súas dúas primeiras edicións (1999 e 2008), en 2022 lanzouse unha terceira edición revisada e actualizada dentro das grandes obras de Xerais

É unha viaxe a través da mitoloxía do país, asentada, na oralidade dos devanceiros e, daquela, un libro de consulta práctico, útil e fermoso ó tempo, pero tamén é unha viaxe que atravesa páxinas de forte contido narrativo, e lectura amena, entretida e divertida.

Co rigor dun dicionario e o feitizo dunha novela apaixonante, este libro constitúe unha das máis importantes aportacións ó patrimonio cultural galego nos últimos anos. Nas 710 entradas das que consta o Dicionario dos Seres Míticos Galegos pode o lector atoparse con xente cativa, xigantes, olláparos, ananos, xacias, sereas, xerpas, rabenos, encantos, lamias, lavandeiras; entrar no pazo dos mouros e conversar coa Mourindade; roubar o peite da moura; recoller carbóns que se convertan nun tesouro; sufrir con paciencia a trasnos, diaños e tardos; durmir con Pedro Chosco; ter medo da Estadea; fuxir con Brancaflor ou oír os contos de María Castaña.O lector poderá visitar as tumbas de Orcavella e a Raíña Lupa; asaltará casas con Pepa a Loba; beberá na fonte de Ana Manana; voará con meigas, chuchonas e nubeiros; correrá sete parroquias cos lobishomes; verá como Deus crea demos e anxos; asombrarase con lobos, cobras, dragóns, basiliscos, cocas, unicornios; navegará no Bergantín Pantasma; andará os camiños coas ánimas da Compaña; tremerá na noite ó escoitar o Paxaro da Morte; enfrontarase co Can Negro, co Lobo Branco, coa Peregrina, coa Zarrulada, co urco e coa Pastoriña; visitará cidades asolagadas e enterradas, como Antioquía, Lucerna ou Valverde, Pozos Peagos e entradas do inferno, Camiños ó Alén e Cabos do mundo; coñecerá os cocos, tales como o home do saco, o sacaúntos, Maríamanta, a meiga dos dentes verdes, o zampón e o orco; lerá o Ciprianillo e desatoará decididamente o saco para pillar os biosbardos. Para atopalos, só hai que abrilo por calquera páxina.

____

Editorial: Xerais 02-2022
Idioma: Galego
Páxinas: 280
MITOLOXÍA